23/01/2010

播放本新聞相關短片

大帝膺票王激死高比

今屆明星賽正選陣容終於出爐,「大帝」勒邦占士在最後一輪投票「發力」,以總票數二百五十多萬票,力壓此前一直領先嘅高比拜仁,成為今屆「票王」!而占士亦成為首位球員在三屆明星賽投票中,均獲得250萬票以上的球員。至於東道主達拉斯小牛主將魯域斯基就在最後關頭被鄧肯趕過,未能「首發」。今屆明星賽將於香港時間二月十五日上演。

經過最後一輪投票,NBA官方公布今屆明星賽正選名單,當中有不少變數,就如前四輪一直領放嘅高比拜仁,最終竟然失落「票王」寶座,勒邦占士以2,549,693票,超過9萬票力壓高比仔,自07年後再成明星賽「票王」。其實占士一向深受全球年輕人歡迎,佢上年總得票亦達到二百九十多萬,連埋今屆在內,成為NBA史上首位三次明星賽投票中,獲得250萬票數以上的球員。

魯域斯基唔介意做「後備」

至於較令人意外嘅「賽果」係「主人家」魯域斯基失落西岸前鋒正選席位,因第五輪選票除網絡票源外,亦包含北美地區嘅球迷短訊及郵寄票數,鄧肯在這些範疇不乏支持者,最終佢亦以六萬多票壓倒魯域斯基,出戰明星賽,魯域斯基接受訪問時就表示,唔介意做正選或後備,因為只要有份參戰明星賽已屬一種榮譽。

另方面,兩屆MVP拿殊亦以超過10萬票力壓火箭棄將麥基迪,搶得「首發」位置。東西岸教練將於本月底決出,由兩岸最佳成績嘅球隊教練擔任,但因湖人嘅積遜及騎士嘅米克布朗上年已做過教練,所以今屆將不合資格。

明星賽正選名單

East(東岸)票數

前鋒 勒邦占士(騎士) 2,549,693

前鋒 加納特(塞爾特人) 1,978,116

中鋒 杜域侯活(魔術) 2,360,096

後衞 韋迪(熱火) 2,327,550

後衞 艾佛遜(76人) 1,269,568

West(西岸) 票數

前鋒 安東尼(金塊) 2,137,560

前鋒 鄧肯(馬刺) 1,156,696

中鋒 史杜迪米亞(太陽) 1,824,093

後衞 高比拜仁(湖人) 2,456,224

後衞 拿殊(太陽) 1,222,235

■本報綜合報道