本文重點
【本報綜合報道】湖人痛宰西岸勁敵！今季被譽為最有條件威脅湖人西岸霸主地位嘅小牛，尋日作客洛杉磯竟然「冇得打」，大敗35分而回，難怪領袖魯域斯基賽後都抱怨球隊防守九流。雖然高比拜仁今場只得15分，但已足夠令佢追平紐約人名宿伊榮嘅得分紀錄，並列NBA史上得分榜第十五位。
緊隨湖人之後暫列西岸第二嘅小牛今場認真失禮，魯域斯基、馬利安及傑特「三巨頭」皆有上陣之下，首節過後竟然落後17分，半場完結就落後25分，最終湖人大勝131比96，西岸大戰竟以大分差落幕。攻入22分嘅魯域斯基賽後明顯唔滿意球隊表現，特別係防守方面。
高比仔今場只得15分，而且全部來自上半場，因為佢第三節後只曾作出一次投射而已。今場過後高比仔已累積總得分24,815分，追平伊榮紀錄，登上史上得分榜第十五位。
奧尼爾被控性騷擾
另一勁旅騎士尋日就遭遇滑鐵盧，主場以88比91不敵山貓，而「巨無霸」奧尼爾更陷入性騷擾案。據美國傳媒報道，女律師Gloria Allred已代表模特兒雲妮莎盧比斯，控告奧尼爾作出性騷擾，而Gloria Allred正係早前被爆同老虎活士有染女士嘅代表律師。