新澤西等東岸地區近日連場大雪，天氣非常惡劣，但因為賽事如期舉行，所以湖人早前作客戰罷公鹿後，就要從密爾沃基飛往新澤西。根據同行一名廣播員描述，當日飛機出咗些微問題，而惡劣天氣亦將飛機吹得搖晃不定，令乘客都頗為驚慌，幸好最終有驚無險，能夠成功着陸，但為求穩定球員心情，教練積遜當日亦冇安排訓練。

網迷倒戈撐高比仔

不過「九霄驚魂」似乎都阻唔到湖人眾將嘅霸氣，雖然籃網後衞迪雲夏里士一度喺第二節獨得17分助球隊反超前，但主隊下半場無以為繼，結果湖人輕鬆大勝103比84。高比仔繼續成為湖人贏波功臣，個人攻入29分及10個籃板球，而佢今場更獲得主場球迷厚待，在第四節佢被球證吹罰時，籃網球迷竟向球證報以噓聲，其後佢大力封阻對手布克盧比斯時，球迷亦大聲歡呼，似乎新澤西球迷都成為高比仔粉絲。