騎士金塊被抓傷

騎士今場都算大意失荊州，皆因打完上半場後，球隊已經獲得11分領先優勢，基於灰熊實力唔算出眾，所以騎士被對手逼至加時，認真抵鬧。「大帝」占士全日表現出色，並為球隊轟入43分、13個籃板及６次助攻，只可惜兩次關鍵三分佢都炒粉，分別係第四節最後一投及加時絕殺一擊，最終騎士僅負兩分。

造出今季得分新高但卻射失可反勝一擊嘅占士，賽後顯得非常失望：「當賽事餘下三秒時，我要做嘅就係射入最後一球，可惜未能做到。」今次係灰熊近四年來首次擊敗騎士，表現最好嘅係「浪人」蘭度夫，取得32分及14個籃板，至於射入奠勝球嘅康利，就獲對手奧尼爾大讚似足全盛期嘅艾佛遜。

另一戰線，金塊同樣爆冷衰喺「動物」手上，主場山貓在最後一節大爆發，單節已拉開９分優勢。「甜瓜」安東尼嘅命運同好兄弟勒邦占士一模一樣，皆因佢今場又係上演個人騷，攻入全場最高34分及７個籃板，但最終都敗走而回。