本文重點
高比仔大發神威，職業生涯第一百次得分「40+」！連輸兩仗嘅湖人，尋日主場出戰活塞打番場爭氣波，全靠高比拜仁攻入40分，以106比93擊敗活塞，湖人食住個勢，聽朝主場對公牛應可再下一城。
（now 671周五早上11時30分直播）
湖人之前表現唔係太順，先後不敵金塊及火箭，幸好尋日對活塞打番出水準，避過遭逢三連敗劣績。
明晨乘勇撼公牛
高比仔今季已經第五次得分喺40以上，超越上季嘅成績，可見高比仔近期手感不俗，但同時亦反映湖人得分過於集中喺佢身上。NBA歷史上，「得分王」張伯倫曾經二百七十一次取得「40+」，而「波神」米高佐敦亦試過一百七十三次，高比仔有機會超越呢兩位前輩。
至於聽日嘅大戰，湖人對手公牛狀態亦唔錯，尋日以101比87擊敗帝王，射手沙蒙斯取得23分，表現搶鏡，而公牛今季亦首次得分過百，今場有本錢同湖人鬥攻。