本文重點
「NBA STARZ」首次同大家見面，我哋會介紹唔同嘅球員，今日先講謝勒華萊士。漫畫《男兒當入樽》有一句至理名言，控制籃板嘅人，就可以控制球賽，令主角櫻木花道走上籃板王之路！當年「臭蟲」洛文憑搶籃板絕技打響名堂，今季山貓嘅謝勒華萊士亦好似突然間開咗竅，季初平均取得十三個籃板，暫時喺聯盟排第一，大有潛質成為新一代籃板王！
叫得「華萊士」嘅，聽個名已知唔易應付，拉舒華萊士同賓華萊士兩個大隻佬，都係ＮＢＡ近十年來響噹噹嘅名字，不過謝勒華萊士呢位後起之秀，喺內線亦愈來愈霸道，除咗籃板數字高踞榜首，就連偷波同封阻都一樣交足功課。
鋼條身形好易認
謝勒華萊士屬於鋼條型球員，只有六呎七吋同二百二十磅，但佢充滿力量同勇悍嘅打法，往往令其他「高個子」吃虧，更曾經喺比賽中途打到「穿肺」，認真得人驚。謝勒華萊士一臉自豪地表示：「搶籃板唔一定要高嘅，你睇以前巴克利同洛文就知啦，最重要係觀察力強，喺適當時間同位置出現，當然身體亦要強壯頂到位啦！班大隻佬個個都好狼死㗎！」