本文重點
「長勝將軍」塞爾特人聽朝又再出動，主場撲擊鳳凰城太陽，「綠衫軍」今季有加納特傷愈復出後，「三巨頭」即重振聲威，加上有超級第六人拉舒華萊士來投，開咧六戰全勝，今回面對已開始跌Watt嘅鳳凰城，大有機會由頭帶到尾，七連捷冇難度。（now 670周六早上8時30分直播）
今季NBA開鑼後，唯一一支未嘗敗績嘅東岸球隊，就係塞爾特人，尋日贏埋木狼後，開咧已六戰全勝。「綠衫軍」季初表現穩定，主因當然係有加納特傷愈歸隊，此外拉舒華萊士及馬基斯丹尼奧斯嘅加盟，亦大大增強板櫈深度，若然連「Big Baby」格連戴維斯都傷愈復出嘅話，塞爾特人想破常規賽最多勝仗紀錄，亦非冇可能。
計實力「綠衫軍」秤先，論狀態一樣係塞爾特人好啲，皆因鳳凰城尋日終斷連勝輸波，球隊作客魔術大敗100比122，其中正選格蘭希爾及積遜李察遜更加同時食光蛋，零分離場，咁嘅狀態點撼塞爾特人呀。其實太陽季初成績好，全因對手較弱，好似快艇、勇士及木狼等，但一撞正重量級嘅魔術，即原形畢露。
綠衫軍攻守兼備信得過
另方面，今季塞爾特人除首戰硬撼勁旅騎士及作客木狼之外，其餘四場賽事都能夠贏對手十分或以上，而「綠衫軍」今季亦從未試過失超過九十分，可見呢班波攻守兼備，值得信賴。