喺甲一籃壇邊個最有Noise？相信睇過頭三場總決賽嘅朋友都一定會話係南華後衞羅意庭，皆因喺修頓室內場二千名fans對佢真係又愛又恨！愛佢嘅南華球迷因佢出眾嘅球技而歡呼、恨佢嘅永倫球迷就因佢經常引來別人犯規而噓聲四起……呢位二十出頭嘅g仔好老練咁話：「適應壓力係做一個好球員嘅必要條件！」今晚係總決賽嘅第四回戰，就睇羅意庭點樣可以幫南華起死回生！
永倫今晚贏埋就掂
依家永倫喺五場三勝嘅總決賽領先緊南華二比一，今晚第四回合再贏多場就捧盃，所以兩軍都會「晒冷」出擊！然而，今季總決賽場場都打得好激，球員拚盡肉搏打得硬淨唔在講，有幾次仲差啲「講手」開大片添，「重災區」首選係控球後衞嘅「羅意庭Vs香振強」，呢對港隊PG都擅長插花、騷球技，搞到互Mark對方時都要出吓超技術，火都嚟埋在所難免！
喺數度「交手」後，每逢南華「彈弓人」羅意庭控球在手，永倫球迷都會打鑼打鼓「噓爆」，南華fans卻以歡呼及掌聲作反擊，一時間喺修頓場有如置身環迴立體聲中，嘈爆全場！對於自己如此被球迷「厚愛」，羅意庭就話有助佢發揮：「如果換轉係啲冇經驗球員，就一定會畀現場環境搞到好緊張。不過，適應壓力係做一個好球員嘅必要條件，老實講落到場我就會好專心比賽，根本分唔出噓聲定掌聲，但係喺咁熾熱氣氛下比賽，我成個人都會醒神啲，絕對有助我喺第四回合嘅發揮，誓要幫南華追番場數到二比二！」
今日賽程
7:00pm 名人賽
籃總邀請隊 Vs 年代球星隊
8:30pm 總決賽Game 4
永倫 Vs 南華
地點：灣仔修頓室內場
票價：$50、長者及學生$30
總決賽果及賽程
Game 1 永倫勝67:52
Game 2 永倫勝57:54
Game 3 南華勝67:52
Game 4 10/7（五）
Game 5* 14/7（二）
*註如有需要