NBA總決賽聽朝上演第五回合，湖人只要贏波就可以第十五次捧起總冠軍獎盃！雖然魔術今場仍擁主場之利，但因教練雲根迪、領袖杜域侯活及控衞尼爾遜上回合均犯下不能磨滅大錯，全軍正陷入信心危機，哀兵上陣，睇怕就算「小魔女」吉娜領唱國歌亦幫唔到手，撐湖人提早捧盃。（無綫明珠台、高清翡翠台、有線165台、now 670台及廣東體育周一早上8時直播）

魔術上場大好形勢下輸波，除了總成績落後一比三被逼至懸崖邊，眾將更已失掉信心，聽朝一戰實難樂觀。正如《ESPN》報道，當日魔術輸波後，更衣室內死氣沉沉，球員及教練雲根迪都一言不發，似乎已失去鬥志創造奇迹。

小魔女勝利獻唱已失靈

事實上，魔術球迷亦將失敗歸咎於雲根迪戰術失當，首先唔應該在關鍵時刻改用尼爾遜替艾斯頓，其次係尾段應採取犯規戰術，令湖人冇機會作三分投射。除球迷之外，艾斯頓亦喺賽後指摘雲根迪嘅調配，足證魔術內部問題升溫。

再者，兩大主將杜域侯活及尼爾遜上場齊成罪人，「魔獸」侯活重蹈師兄戴歷安達臣於九五年總決賽時，射失關鍵罰球覆轍，而尼爾遜就要為兩度讓費沙輕鬆投射而孭鑊！既然一眾球員都心情沉重，猜忌多多，聽朝又邊有心機創奇迹，加上「小魔女」吉娜「七連勝」（吉娜今季前七次於魔術主場領唱國歌，魔術都贏波）已畫上句號，今回再邀佢領唱國歌亦冇用，魔術今回讓3分，一於取受讓嘅湖人。