已經喺今季季後賽出局嘅馬刺後衞柏加，早前透過經理人報案，指有賊仔偷咗佢心愛嘅珍藏，就係「波神」米高佐敦親筆簽名波衫！幸好警方調查後已經拘捕嗰名賊人，令柏加的珍藏失而復得。
保安看屋監守自盜
眾所周知，「波神」嘅簽名波衫有價有市，賊人到手後變賣，隨時可以賺到過萬美金！柏加報警後，警方隨即展開調查，並喺網上發現一名廿二歲男子正在拍賣網站放「波神」簽名波衫，於是起佢底，發現佢係一名保安人員，並曾經幫過柏加做事，原來佢就係竊匪。
據悉，柏加早前裝修屋企時，曾經聘請唔少保安人員幫自己「看屋」，以免讓賊人有機可乘入屋行劫。但勢估唔到，呢位保安員竟然財迷心竅，入屋偷走柏加珍藏波衫變賣。