本文重點
血拚廿四年後，金塊終再嘗西岸決賽滋味！是非多多嘅西岸四強「金牛戰」，尋日終於畫上句號，金塊返回主場即交出水準，合共有五位球員攻入「15+」得分，結果由頭帶到尾下輕鬆以124比110贏波，總成績四比一淘汰小牛，率先殺入西岸決賽，今次亦係金塊自八五年後，首次進身西岸決賽，難怪丹佛市球迷都進入瘋狂狀態。
金塊都可算係苦盡甘來，皆因近五季季後賽都喺首圈行人止步，睇怕季前都冇人估到佢哋可以見關過關。球隊尋日有「鳥人」基斯安達臣復出，幫手防範小牛主將魯域斯基，而開賽之後，金塊亦係表現較好一隊，首節已領前七分，第二節更憑安東尼及比立斯連番命中下拉開分差，金塊半場領先六十九比五十五，小牛形勢更見惡劣。
最佳一隊占士滿分票王
小牛下半場採取主動，傑特及魯域斯基嘅三分波一度為球隊追貼分差，可惜球隊防守力實在太差，最終末節追分亦已太遲。金塊眾將今場都交出表現，安東尼、比立斯、連尼、簡安馬田及JR史密夫得分都達「15+」，其中最出色依然係「甜瓜」安東尼，個人攻入卅分，其中包括四個三分波。至於另一領袖比立斯亦有廿八分進帳及十二個助攻，呢對組合喺季後賽愈見「恐怖」！
另方面，ＮＢＡ常規賽最佳一隊名單亦已出爐（見附表），ＭＶＰ勒邦占士以滿分六一○分成為「票王」，其餘入選者包括湖人後衞高比拜仁、熱火後衞韋迪、小牛前鋒魯域斯基及魔術中鋒杜域侯活，而「小巨人」姚明則以三五四分入選二隊。