本文重點
阿Bob之前講過，湖人每次輸波後，就係高比爆發之時！果然首戰失利嘅湖人尋日憑高比拜仁轟入四十分，加上火箭尾段有主力阿堤斯兇高比而接「技犯」離場，最終湖人輕鬆以一一一比九十八贏波，總場數追成一比一。
由於兩軍都有唔少惹火人物，所以「紅、黃大戰」第二回合一開賽就充滿火藥味。擁主場之利嘅湖人首節已強攻火箭，結果單節領先卅九比廿五，拉開十四分距離。但估唔到陷於劣勢嘅火箭竟然喺第二節復甦，喺阿堤斯連番得分下，完半場時打成五十七平手。
常規賽防守一隊選出
第三節尾段，火箭嘅史高拉同胡查錫發生口角，其後湖人老將費沙更一㬹批中史高拉，被球證以「二級惡意犯規」直接判罰離場。不過費沙都唔愁寂寞，因為向來都有牙齒印嘅阿堤斯及高比拜仁喺末節衝突，當時阿堤斯不滿高比仔批㬹而追住佢嚟兇，結果球證判佢「技犯」，將佢趕離場。最終湖人喺末節拋開分數，取得次圈首勝。
另方面，今季常規賽防守一隊陣容已出爐，魔術中鋒杜域侯活以最高五十五分入選，其餘四人則包括湖人嘅高比拜仁、騎士嘅勒邦占士、黃蜂嘅基斯保羅及塞爾特人嘅加納特。