本文重點
姚明職業生涯首場季後賽次圈賽事聽日上演，火箭先作客對湖人。雖然火箭完成創舉，十二年後再嘗季後賽次圈滋味，但對手湖人實在太強，「紫金兵團」今季喺常規賽四次面對火箭贏晒，加上佢哋首圈以四比一淘汰爵士，比火箭擁較多休息時間，又有主場之利下，湖人可望輕鬆擊敗火箭。
雖然風頭被騎士搶晒，但湖人今季實力絕對有增無減，尤其係拜林嘅復出，令湖人喺兵源同人腳調配上更見充裕。湖人首圈輕輕鬆鬆以四比一淘汰爵士，提早晉級，足足較火箭多三日休息時間，以逸待勞下今場肯定有着數。
主場勝率近九成
除體力佔優外，湖人往績亦食住火箭，今季湖人喺常規賽四勝火箭，當中兩場主場賽事更係大勝格，首場贏十二分，而第二場更加大炒廿九分之多，足證火箭作客洛杉磯發揮欠理想。此外，湖人今季主場成績彪炳，連同季後賽在內，44場主場賽事39勝5負，得勝率接近九成，主場威力非常犀利。休息時間、往績及主場之利三大元素佔優下，湖人讓8分都要捧上盤。