本文重點
經過近年最激烈的第一圈賽事，塞爾特人終在七場四勝制的最後一場，憑主場之利，以一○九比九十九擊敗公牛，進身東岸次圈，明早鬥魔術，雖有主場之利，但體力輸蝕，未必穩勝。（周二早上８時開賽）
「綠軍」塞爾特人對公牛，肯定是今季季後賽首圈鬥得最激的系列，除鬥足七場，其中四場更要打至加時，合共打了七次加時，「綠軍」費盡九牛二虎之力終在最後回合贏波，並且早於第二節拋離，奠定贏波基礎，算是七仗之中較為輕鬆一仗。
明鬥魔術輸體力
第六回合射入五十一分的雷阿倫，今仗繼續有好表現，貢獻廿三分、七個籃板球及三個助攻，皮雅斯則射入二十分及摘下九個籃板球，這名功臣表示，今次是一個艱難的系列：「相信今次係我職業生涯其中一次精神壓力最大嘅系列賽，好彩我哋終於捱過，而我哋仍然可以話畀人知，我哋係ＮＢＡ總冠軍，直至我哋被淘汰。」
塞爾特人雖然贏得精彩，但七個回合付出的體力卻要花時間回復，明早就要鬥魔術，相信有暗湧。兩軍今季四次對賽各贏兩場，實力不相上下，但魔術始終抖多兩日，應該較着數，塞爾特人主場未必贏梗。