本文重點
【本報綜合報道】又一個NBA常規賽獎項出爐，小牛後衞泰利以大比數成為今季最佳第六人！今次選舉泰利獲得111張首輪選票，較第二位金塊射手JR史密夫足足多108張首輪選票，最終佢得到576分，而JR史密夫就獲得155分居於第二，至於第三位嘅就係「入樽王」尼特羅賓遜，獲得113分。
想角逐最佳第六人呢個獎，首要條件就係後備上陣次數比正選多，今季泰利74場常規賽中，有63次後備入替，但佢竟然攞到平均19.6得分，成為小牛二號射手，後備出場往往有料到。
騎士橫掃活塞呼聲高
另方面，尋日騎士作客活塞繼續贏波，以79比68輕鬆擊敗對手，總成績領先到三比○。因NBA史上從未有一支球隊喺七場四勝制下，輸0比3後反勝出線，所以騎士出線已高唱入雲，明日凌晨兩軍再戰，睇怕騎士都大有機會橫掃對手。（周一3:30am開賽）