本文重點
隨同囝囝遠赴巴塞隆拿接受訓練嘅一班爹哋媽咪，雖然都好想寸步不離個仔，但上緊堂嗰陣冇得貼到實，不如用Shopping嚟打發時間，魯營球場隔籬就係巴塞嘅Megastore，球會嘅精品應有盡有，令家長們滿載而歸。
巴塞嘅Megastore共有兩層，以售賣球衣及足球精品為主。由於依家已經接近季尾，印上球星名字及號碼嘅球衣全部做緊七折，每件賣六十七點五歐元，而且仲係買二送一添！其餘貨品種類繁多，連已離隊嘅朗拿甸奴嘅物品都仲有得賣。
|
|
|
細哨精品仍然熱賣
好似「細哨」嘅Ｑ版公仔仍然放喺店內當眼位置擺賣，售價係二十九點七歐元，細哨雖然已經離隊，但似乎人氣未減喎。不過前教練列卡特同過咗車路士嘅中場迪高就冇咁得寵，只能喺一條特價六歐元嘅童裝內褲之上，發現二人嘅卡通肖像。
至於店內最熱賣、品種最多最齊嘅，當然係天之驕子美斯嘅商品啦！一本以佢為主角嘅漫畫書，就盛惠九點九五歐元；而另外好似Figure公仔、水壺、襪仔等精品乜都有齊，而一班「美斯迷」家長見到都勁開心，紛紛大破慳囊買個夠本！
光頭仔巴塞隆拿直擊