ＮＢＡ季後賽下周中開戰，打到依家嘅重要時刻，球員真係唔可以有乜閃失，力爭第五個總冠軍嘅馬刺尋日收到噩耗，「三巨頭」之一真路比利因拉傷右足踝，被迫提早收咧，最慘嚟緊仲要面臨「魔鬼賽程」，「三哥」隨時變「老八」！
鬥拓荒者備受考驗
上季ＮＢＡ最佳第六人真路比利，今季受傷患困擾缺席咗足足十九場賽事，但平均每場仍然有十五點五分同三點六次助攻，可惜日前對騎士一戰佢再次受傷，賽後醫生為他進行磁力共振檢驗傷勢，證實右腳足踝筋鍵撕裂，要提早收咧。不過，最弊嘅係依家暫列第三嘅馬刺嚟緊要連續硬撼拓荒者、爵士同黃蜂，目前佢哋只領先第八位嘅小牛三場勝仗，之後有乜差池，隨時跌落第八，因此佢明早主場對拓荒者，將備受嚴峻考驗。
米高佐敦入名人堂
另外，ＮＢＡ公布○九年加入名人堂嘅五位新成員，分別係米高佐敦、史托頓、大衞羅賓遜、爵士教練史龍同羅格斯大學女子隊教練絲雲嘉，或者大家會奇怪點解「波神」退休咗咁耐，依家先被列入名人堂？
其實名人堂喺一個好高嘅榮譽，要球員退役咗五年以上先有資格，而做教練嘅更要教足廿五年以上先有機會被提名，適逢今年係名人堂成立五十周年，對○三年退休的佐敦來講，更加突顯佢喺籃壇嘅崇高地位。
本報綜合報道