今日舉行香港國際賽，我將會擔任《賽馬直擊》的客串主持，與蔡俊佳等評馬人齊齊分析十場賽事。連續兩年出戰香港一哩錦標的「壯思飛」，今日卻在第六場跑二班一哩，可恃卡士克敵。另外，第一場「噴火龍」及第十場「綫路勇駒」可作為熱門馬膽看待。
第六場二班1600米，「壯思飛」上季尾曾不斷於分級賽跑得接近，戰鬥力未見太大退化，今季復出頭兩仗亦有表現，剛戰改用利敬國發揮未如人意，敗績可以抹去。純計狀態，此匹6歲馬仍保持水準，回師一哩更合腳法，配合5檔好位，依然惡氣十足，況且今場對手青黃不接，舊馬近期演出回落，幾匹名氣大的初出自購馬進度未夠，有助「壯思飛」爭勝。
第九場二班1200米，「百步穿雲」上季曾兩勝谷草1200米，今季卻集中跑1400米及谷草1650米，效果始終未如理想，今次終於肯回師短途，強配走位機警的麥道朗，值得重視。
熱門馬膽方面，第一場四班1400米，「噴火龍」剛戰後上贏1200米姿態吸引，當時去到最後二百米才撻着，今趟增程屬正面部署，況且細馬體重增加20磅屬好現象，再下一城機會樂觀。
綫路勇駒強配班利
第十場三班1400米，「綫路勇駒」上季尾於二班仍跑近，落到三班有優勢，但需要硬功好手發揮，今趟用布宜學深慶得人。
張基
