政情：陳家駒倡體育運動產業化 培育精英
建造業議會主席陳家駒尋日發表網誌，表揚今屆港隊奪得亮麗成績，指運動員嘅傑出表現有助凝聚人心，認為需投入更多資源，培養運動人才，又談及體育運動產業化。陳亦有恭賀中國隊以38面金牌位列金牌榜第2位，但就對中國女排於初賽時已淘汰出局，大嘆可惜。
大讚港隊奧運奪佳績
今屆港隊於奧運勇奪1金、2銀、3銅，陳家駒以「十年樹木，百年樹人」嚟形容運動員多年努力終取得成績，卓越嘅比賽成績需要經過幾代人努力同大量資源配合方可成功。陳回顧早於80年代，獲邀加入銀禧體育中心，即香港體育學院前身嘅執行委員會，當年未有全職精英運動員制度，大部分運動員需要喺公餘或課餘時間接受訓練。雖然現時運動員所得資源較往日多，體院喺2019至2020年間，投放於精英運動員嘅支出接近6億港元。但陳認為長遠而言，體育運動必須產業化，引入商業贊助，方能吸引年輕人投入精英培訓。