政情：推廣體育不能只關心精英項目 顏汶羽嘆本土賽事遭冷待
香港運動員喺今屆奧運奪得6面獎牌，係歷來最佳成績，公眾嘅視線都圍繞精英體育項目，同埋主張投放更多資源於大型賽事。之但係，觀塘區議員顏汶羽就認為體育運動社區普及化更為根本，但可惜本土嘅體育賽事長期遭到冷待，不利於體育推廣，更遑論提升市民對運動嘅關注。
倡締造主場氣氛 凝聚支持者
顏汶羽話政府購入奧運播放權，畀所有電視台鋪天蓋地式咁播放，但又何曾播放過香港本地足球、籃球聯賽等運動賽事呢？佢又以本地足運為例，指早前有兩隊球隊退出港超聯，相關足球員生計及事業發展到底何去何從？佢話港超聯嘅球賽連最簡單嘅網上購票都辦不到，要球迷喺現場排隊購票，仲算係智慧城市嗎？至於普羅市民，有意訂球場參與體育運動亦難過登天，往往要向「炒場」者購買球場使用權，點解政府視而不見？
佢建議政府應考慮將體育設施交畀各體育會營運，咁就能夠有固定場地優先訓練，亦能更有效凝聚支持者，締造「主場」氣氛。
佢話只有運動普及化，先至可以從中發掘具潛質嘅運動員並加以培養，所以推廣體育唔能夠只關心精英項目，更加要關注普及體育嘅發展！