政情：辦攝影展籲愛惜自然生態 作品循環用 葛珮帆夠環保
原來喺日常器物以外，攝影展覽都可以應用「循環再用」呢個環保原則。議員葛珮帆（EQ）由2011年開始，每年都舉辦一次攝影展以提高大眾對環境同生態嘅關注，而今年佢就聯同6位攝影愛好者，展出璀璨嘅極光畫面同埋喺極地所拍攝嘅作品。但心水清嘅觀眾會發現，今次EQ有部分作品以前都展出過，莫非佢唔夠新作品，要靠搵舊相嚟湊數？
場地所限 新作電子屏展出
EQ話其實佢有好多幅新作因場地所限，須移往電子屏幕展出。但佢都坦言今次係有小部分舊作，譬如有一幅海獅BB嘅面容特寫，就喺上次南極攝影展當中出現過，但鑑於呢幅相片好受小朋友歡迎，所以今次再度展出。
問到點樣收藏展品？EQ話每次展覽完畢都要面對呢個問題，而佢嘅做法就係改為掛喺辦公室，遇到適當機會就再攞出嚟畀公眾睇，如果遇到知音同好，仲會將作品慷慨相贈添！不過，佢話每次展覽過後，總會有作品因遭人用手觸摸而導致損毀，因此唔係所有作品都可以循環再展出咁話。