政情:放假帶外母歎鮑魚 何栢良樂做柴可夫

新冠肺炎疫情持續一年多,港大感染及傳染病中心總監何栢良工作亦非常忙碌。日前見佢喺Facebook貼文,話自己放假就做司機,仲要請食飯,享用18頭南非鮑魚添,究竟咩事令何栢良難得放假都變身「柴可夫」呢?

話用消費券振興經濟

原來何栢良嘅外母近日有啲小問題要做手術,當日下午要去診所覆診,所以何就攞假做司機,睇完醫生再直落去食晚餐。佢又話疫情關係長者都好耐無得出街食飯,所以咪趁機會帶外母去食好嘢囉,外母仲好開心用錄音同其他家人分享節目啊!

佢仲話,其實佢已經成年都無放過假,所以見近日疫情穩定咗,咪清吓假期囉!再加上今個月拎咗消費券,出去振興吓經濟都好嘅。