政情：鄧炳強現身茶餐廳 粉絲爭合照攞簽名
之前同大家講過，有議員喺立法會大樓遇到保安局局長鄧炳強，即刻捉住佢反映意見，另一位議員尋日就喺茶餐廳巧遇局長，仲見到佢畀市民包圍住影相同攞簽名添！
話說議員柯創盛（柯仔）尋日去到一間茶餐廳食嘢，見到有個人畀市民圍住影照、攞簽名，佢就好奇咁諗到底係邊個嚟呢？一望清楚，先發現係鄧炳強局長。
柯創盛：真的很興奮
柯仔見到局長，就一齊飲杯茶、打吓卡、討論一吓公共政策，期間有市民過嚟影相，亦有小朋友過嚟玩。柯仔話鄧真係有好多「粉絲」，又形容鄧同市民打成一片。最後鄧仲用咗消費券請柯仔飲茶，柯仔就用到最近一句網絡潮語，話尋日喺茶餐廳「真的很興奮」啊！