政情：傾盆暴雨浸死豬 陳月明：排水問題須解決
香港雖號稱先進地區，不過部分鄉郊地方嘅排水系統仍十分落後，一旦遇上豪雨就頓成澤國。北區區議員陳月明日前喺社交平台大吐苦水，指打鼓嶺受到連日來嘅暴雨影響，出現大範圍水浸，情況較3年前嘅颱風山竹更嚴重，當中就有豬場遭到傾盆暴雨所淹沒，死咗14頭豬，包括懷孕嘅豬媽媽，而幸存嘅豬隻亦有機會因不潔水質而受感染，善後工作十分艱巨，都可謂「陰功豬」囉。
流浪狗收容中心亦遭殃
除豬場外，陳月明話打鼓嶺有流浪狗收容中心遭到水浸，但幸好場主將場內嘅狗隻及時轉移，先至避過一劫，不過水退後嘅收容中心就滿目瘡痍。而蓮塘口岸迴旋處附近就因建築工程關係，一場大雨就令到蓮麻坑路嘅車輛沒頂。
陳就水浸問題，日前出席政府跨部門緊急會議，佢強調並非追究部門責任，而係關注政府到底會作出乜嘢應對措施呢？畢竟颱風暴雨將陸續有來，長遠而言排水問題必須解決，希望政府各部門吸取今次水災教訓，切莫等到釀成大禍先至去亡羊補牢啦。