政情：林正財教老友記 慎用消費券防騙
長者往往係不法之徒嘅行騙對象，加上現時正值消費券發放，老友記就更加要小心。行政會議成員、安老事務委員會主席林正財，日前就喺一個電台節目中呼籲老友記使用消費券要提高警覺，又過幾招安全消費嘅小貼士。
宜幫襯熟落商舖
林正財話有部分長者因優惠而選用一啲陌生嘅支付平台，有機會因用唔慣，畀人扣多咗錢都唔知，而喺發放第一期電子消費券首日，就傳出有商舖收取附加費嘅消息。佢話老友記唔想畀人呃，不妨參考佢嘅建議，就係現時發放嘅第一期2,000元消費券，唔好用嚟購買從來未買過嘅嘢，以及幫襯熟落嘅商舖，咁做就會最安心，因為慣常購買嘅商品會較為容易掌握其合理價格，人哋見你係熟客仔照計唔會呃你啦。當習慣電子消費券嘅操作，用第二期發放嘅消費券金額去幫襯其他商舖，或購買一啲從未買過嘅商品都未遲。
林又話長者要小心預繳式消費，務必睇清楚相關條文。如果仲未登記電子消費券的話就要快手啦，老友記要搵後生仔幫手的話，當然要搵信得過嘅後生仔呀。