政情：何俊賢睇女乒直播 驚李靜又爆粗
香港運動員尋日贏得東京奧運乒乓女子團體賽銅牌，唔少人都睇直播觀看賽事，當中包括漁農界議員何俊賢（高佬賢），一樣睇到好肉緊。去到賽事尾聲，佢仲喺社交平台貼文，話勝利在望、不可鬆懈，仲溫馨提示曾奪奧運男子乒乓雙打銀牌嘅港隊教練李靜唔好太激情咁講廣東話呀，皆因直播緊呀！
話說早前港隊出戰女子乒乓球團體賽激戰巴西，李靜喺場外指導港隊代表杜凱琹時曾經爆粗，講咗「×！你企喺中間啦！企中間佢發你長嘅，你咪反手拉佢囉！OK？好嗎？」隨即喺網上瘋傳，引起熱烈討論。
「不要太激情地用廣東話」
唔知高佬賢係咪對呢一幕歷歷在目呢？佢就喺比賽差幾分結束嘅時候喺Facebook話「穩！勝利在望、不可鬆懈！」仲提醒李靜「不要太激情地用廣東話呀！」之後仲笑咗幾下。唔知係祝賀港隊，定笑吓李靜呢？
