政情：林子琼議辦交吉 辭職補影畢業相
政府要求區議員宣誓至今雖仍未落實，但早前有傳若未能通過宣誓者將被DQ，仲會被追討過百萬薪津，引發區議員辭職潮。北區前區議員林子琼都喺上月8日宣布辭職，佢日前再喺社交平台貼文，指議辦已經正式交吉，仲貼出咗一張戴四方帽嘅畢業相，原來佢由剛上任已經想影，但係辭職先影到張相喎。
做無業游民
佢話區議員係第一份全職工，除咗前區議員呢個身份，其實佢只係啱啱畢業嘅學生。佢喺貼文附上一張畢業相，形容係「上任就想影，但是辭職先影到既（嘅）畢業相」。
就任區議員一年零七個月嘅林子琼話，目睹只剩一片空白嘅辦事處，話冇難過就係呃人嘅，不過呢一年幾好或唔好嘅事，都化成回憶喇。佢又提到自己已進入無業游民嘅狀態，開始頭幾日感覺好不安，但如果冇辭職，相信會令身邊愛惜自己嘅人更加不安咁話。