政情：議席增 要加位 立會大樓趁暑假改建

立法會大樓外圍正加設花槽圍欄以強化保安。

增花槽圍欄 裝閉路電視

立法會依家正處於抖暑日子，只有部分委員會仲開會，立法會大會就要等到今個月18日嘅先復會。立法會就把握時間進行加位工程，喺一樓會議廳及二樓會議室，增設議員座位及鋪設所需線路。根據早前文件顯示，秘書處亦會將只用嚟舉行閉門會議嘅會議室4，改裝為可舉行公開會議嘅場地，包括增設傳媒攝影室、公眾席及即時傳譯設施等。

• 有工人在立法會大樓內進行增建設施工程。

因前年反對修訂《逃犯條例》風波中，示威者破壞立法會大樓設備，加上2018年前議員許智峯搶手機一事，發現大樓內部分地方屬「死角位」，立法會行政管理委員會決定加強保安，包括喺大樓外圍加設花槽圍欄，內部加裝閘機同閉路電視。

至於依家工程進度係點呢？秘書處回覆時就話，加設會議室座位，連同喺大樓內加設閉路電視同閘機，及喺立法會廣場周邊加設花槽圍欄嘅工程，預計喺第7屆立法會開始前完成，即係今年12月前。