政情：美食車慘淡爛尾 陳婉嫻轟政府離地 話棄就棄
美食車先導計劃運作4年一直成效不彰，最近政府似乎打定輸數，早前指美食車喺香港作為旅遊設施嘅發展實在有限，正喺到檢視計劃數據以及成效，唔排除最終會結束計劃。當初有份提倡計劃嘅前議員陳婉嫻（嫻姐）狠批現今嘅美食車計劃同當初嘅建議完全唔同，並唔係針對性咁幫助基層小販，仲話想去「砌」政府添！
嫻姐尋日喺一個記者會上力數政府離地，忽略勞工保障，又「翻舊帳」，話早年喺立法會提倡成立美食車先導計劃，希望係用細細部車，容許流動小販售賣例如豆漿等簡單食物，藉此創造就業機會，改善基層人士嘅生計，而唔係後來動輒要投資80萬元先至能夠營運美食車。
跟住愈講愈勞氣，嫻姐不滿政府現時輕輕一句就話唔排除取消計劃，強調香港有無數空間可以創造就業，但政府往往欠缺有關概念，但可惜自己太忙，否則的話會直接去「砌」政府！
點名鬧爆陳帆唔聽人講
講到美食車同旅遊發展嘅關係，嫻姐又聯想到航空業。佢話喺新冠疫情之下，航空業無疑成為重災區，但其實亦有方法可以支援相關從業員，例如供應飛機餐畀餐飲市場，而外國政府就會支援有關行業，幫助佢哋喺市場維持一定嘅佔有率。而政府亦應該為飛機師提供培訓基金，等佢哋冇工開都可以持續進修。嫻姐提到航空業係重要行業，政府一定要想方設法保留有關人才，為日後復飛做好準備。不過佢就點名鬧爆運輸及房屋局局長陳帆並無吸納建議，仲話好多時同官員商討都好勞氣，因為佢哋不食人間煙火喎！
本港貧窮問題嚴重，嫻姐提到一位只得30幾歲嘅年輕街坊本來就收入微薄，如今加入失業大軍經濟更為拮据，為咗慳錢只好喺快餐店垃圾桶尋找可以果腹嘅剩食。嫻姐批評政府未有盡力解決貧窮問題，直言如果政府只係將目光投放於上層建築、視線並唔着地，係完全感受唔到香港咁繁榮嘅城市，仲有大量貧苦市民。雖然嫻姐早已卸任議員職務，但對政府表現始終係恨鐵不成鋼，唔知政府幾時會聽得入耳，用心改善各種經濟同民生問題呢？