政情：沉寂幾日再「上水」 分享撰文 穆家駿借教協轉移視線？
早前批評港隊羽毛球「一哥」伍家朗穿着欠區旗標識嘅球衣出戰東奧賽事，而引起軒然大波嘅民建聯成員穆家駿，被網民連番聲討後日前「上水」道歉，沉寂數日後又再發聲，不過今次就轉咗目標，改為炮轟教協。
斥教協冇資格代表業界
穆家駿上周道歉過後又再「潛水」，雖然佢嘅Facebook社交專頁仍然關閉，但身兼教育工作者聯會（教聯會）副主席嘅穆家駿，尋日就喺微博分享佢嘅報章撰文，批評教協係大話連篇嘅所謂「教師專業團體」，冇資格代表業界。佢提到教協自反對國民教育事件後，以政治介入教育嘅事例比比皆是，工會內嘅激進派令教協愈走愈偏激。穆同意本港教育要正本清源，必須去除教協呢個「毒瘤」。
唔知穆家駿係咪藉狠批教協，轉移輿論視線以收公眾丟淡「球衣風波」之效呢？有傳媒向穆家駿查詢近況，不過電話轉駁至秘書處，暫時未有回應。