政情：搽陳年活絡油紓頸痛 黃偉鴻灼傷難眠
藥唔可以亂食，但只供外敷嘅藥油亦要慎用。香港品牌發展局副主席黃偉鴻早前頸椎痛，連帶左肩都麻痹乏力，雖然先後試過針灸、脈衝電療等多種方法都無法治愈，日前佢就試吓搽活絡油，點知啲油搽落皮膚度即感到好似火炙嘅灼痛，患處又紅又腫似燒傷，跟住痕癢來襲，搞到無覺好瞓。
其實黃偉鴻近日都有搽跌打酒同活絡油嚟紓緩頸椎不適，之不過事發當日，佢慣用嘅跌打酒同活絡油都用晒，咁啱又畀佢發現屋企裏面原來藏有一樽陳年活絡油，雖然唔係用開嘅品牌，但本住一試無妨嘅心理，打算倒些少落皮膚試吓先。
倒瀉油觸及肩胛前胸
點知開樽時，樽口略為傾斜跟住啲油就倒晒出嚟，當時狼狽之餘，活絡油觸及嘅肩胛同前胸等部位，都感到好似火燒咁。
搽油竟出現灼傷嘅感覺，到底係樽油變質抑或喺啲油嘅成分會引起皮膚敏感呢？黃偉鴻話唔排除呢兩個可能，雖然畀油「灼傷」嘅皮膚仍未完全康復，但令佢驚喜嘅係，困擾多時嘅頸椎痛竟然冇再痛。