政情：鍾國斌自爆 跟過水怪習泳
曾經被冠以「立法會飛魚」美譽嘅紡織及製衣界議員鍾國斌（Felix），過去亦曾參加過渡海泳，依家正值奧運熱浪，佢尋日喺Facebook（Fb）自爆曾經跟過「神級水怪」史畢茲（Mark Spitz）學游水。
「即時游快咗」
Felix早幾日喺Fb貼文，形容自己係過氣泳手，盛讚攞到兩面奧運銀牌嘅香港女飛魚何詩蓓。佢尋日又再喺Fb貼文，話依家嘅世界飛魚叫菲比斯（Michael Phelps） ，80年代最出名嘅係「水怪」史畢茲，而當年未過氣時都畀史畢茲教過兩堂，真係即時游得快咗啲。
呢段貼文甫出，惹起唔少回響，好多網友都問佢係咪講真？而佢同時上載咗張同史畢茲嘅合照，咁應該唔會假喇！更多嘅網友對Felix年輕時嘅樣更有興趣，事關佢個樣似一個明星，已有個花名叫「政界方中信」，但有網民形容佢張相個樣似另一個藝人李治廷喎。大家點睇呢？