政情：投標價少預算3億 議員憂水務工程爛尾

陳恒鑌質疑有公司或為「爭標」刻意降低標價。

恐專登壓低標價博申撥

該小組委員會委員陳恒鑌認為，差額大或者係政府喺疫情前進行造價估算，所以同依家情況有落差，亦有可能有公司知道或會蝕本，都故意壓低標價。佢指過去有工程承包商以低價成功投得工程，但最後因超支被迫停工，需要政府再申請後期工程撥款。佢認為政府應參考澳門做法，招標時剔除最高及最低價嘅標書，並以多種模式招標，否則好易出事啊！佢又話政府應該要喺發展事務委員會上，詳細解釋招標評分分布及準則。

• 盧偉國指差額反映投標者喺價格方面較進取。

不過，工程界議員盧偉國就話實際投標價有時同估計時有較大出入，可能同競爭激烈、工程量多少，物料與人工格價波動，或者投標者有特別節省成本方案等有關。佢分析認為受市場情況影響，投標者喺價格方面較進取，而疫情影響市場，失業率較高，企業希望投得工程保持企業營運同保障員工生計。