政情：田北辰孖財爺濕平 $2000幾乎冇剩
市民前日開始可以領取第一期電子消費券，全城都諗緊點樣用盡消費券。相信大家都見到財政司司長陳茂波前日走幾場，晨早去飲早茶，兼做埋侍應送蝦餃，又去咗茶餐廳，之後仲去買體育用品同打咗場友誼波添！有啲場合總有一兩個議員傍住，咁孖住財爺去買體育用品嘅係邊個？原來係田北辰（田二少）。
田二少話自己喺前日攞咗2,000蚊消費券，即日已經使咗1,300蚊買海鮮，下廚煮海鮮餐畀同事食，而剩低嘅700蚊佢都諗住同一日用晒佢，希望可以振興經濟喎。
陳茂波買運動配件
兩人去到荃灣一個商場購物，近來奧運熱潮一浪接一浪，又適逢前日係全民運動日，田二少就買咗對跑鞋，首期消費券剩番80幾蚊，差唔多用晒，而陳茂波就用570蚊買咗運動配件，仲要係加碼消費添！田二少又話佢哋遇到好多街坊，都好熱烈分享點用消費券，認為無論大家係衝動式消費、報復式消費定係日常消費，用得開心就最實際喇！
邵家輝落區打打氣
唔單止財爺同田二少鼓勵市民用電子消費券，啲商販都好緊張係咪可以做多啲生意，而批發及零售界議員邵家輝前日都去咗銅鑼灣，走訪商販同零售店，包括日常生活用品嘅商販、藥房、電器及傢俬、化妝品及運動用品店等，希望為佢哋打打氣，又訪問商戶預期生意，同埋了解吓市民使用消費券嘅情況喎，仲親身試用電子消費券添！
邵話觀察到前日已有市民率先領取並開始喺商戶使用消費券，商販分別透過四個電子支付平台收取消費券過程亦非常順利，市民購物明顯較「爽手」，商戶生意水漲船高，希望真係有助刺激消費啦。邵仲話對比政府上年中派發一萬元現金，今次消費券具時限性，冇得儲起，而唔少商場同商戶亦推出各式各樣優惠招來顧客，估計唔少市民都會喺消費券以外再加碼消費。加上現時正值暑假同東京奧運舉行期間，唔少商場都有宣傳活動，相信都有助帶動人流同消費氣氛嘅。