政情：場地不足 顏汶羽：阻體育運動普及化
今屆東京奧運，港府首次購買賽事嘅播放權，而康樂及文化事務署今日則舉行「全民運動日」，開放轄下康樂設施預訂免費使用。觀塘區議員顏汶羽話政府雖銳意提升市民對體育運動嘅參與度，然而康體場地及設施不足，係阻礙體育運動普及化嘅一大因素，若果問題未得到正視，咁就算再多賽事直播都係枉然。
顏汶羽話，昔日公共屋邨內常見嘅手球兼足球場早已消失，連屋邨籃球場轉售後亦變成商業場地，令整體康樂場地及設施嘅供應量大減。至於康文署嘅場地則嚴重供不應求，加上廉宜嘅收費引來尋租行為，形成「炒場」現象，私營機構舉辦嘅康體班組亦因場地嚴重不足而價格高昂，令基層市民難以報名參與，而極大部分嘅香港球隊就因欠缺場地，難以進行恒常練習。
倡加租杜絕炒場
要打破呢個惡性循環，顏汶羽話港府應提升康樂設施與人口嘅比例之外，亦應考慮將康文署場地及設施租金提升至市價水平，以杜絕「炒場」情況，然後向基層市民派發康體券，為參與文康活動、同使用康體場地提供資助，相信此舉應可一定程度上紓緩目前棘手嘅康體問題咁話。