政情：海關領袖暑期訓練營 中式步操結業
海關尋日舉行「海關青年領袖團暑期訓練營」結業會操，首批「海關青年領袖團」57名青少年成員自訓練期間已經練習中式步操，結業會操順理成章亦以中式步操進行。海關副關長何珮珊，同助理關長（情報及調查）陳子達亦有出席活動，與結業學員交流。
助認識自我 職業導向
參與嘅青少年喺7月26日至30日入營參與訓練，除咗接受各項紀律、體能、步操及領導才能的訓練之外，仲參加咗一系列包含認識自我、職業導向、領袖訓練等元素嘅活動。認識海關各個工作範疇同負責執行嘅法例外，亦加深了解自己，認真思考未來目標，並確立個人嘅發展方向。裁判官杜浩成都有參與活動，向學員分享法律知識。
訓練營係今年海關推出「Customs YES」計劃下嘅一項活動，鼓勵參加計劃嘅12至24歲青少年全面發揮潛能，培養正面價值觀以及對社會嘅歸屬感。到今年7月，「Customs YES」計劃已經招募咗860名個人會員，及包括學校及非政府組織在內嘅20個團體會員，期間多個專題活動，已經累積超過1,000人參與。