政情：容溟舟籌旗出糧 乘機散倉底貨？
因擔心不符宣誓資格，以致被政府褫奪議席同追討薪津，早前爆出區議員離職潮，其中包括沙田區前區議員容溟舟，不過結束議員辦事處同遣散員工都在在需財，尋日佢就透過社交平台公開呼籲，希望市民幫手買啲倉底貨，以減輕財政壓力咁話。
容溟舟指佢喺馬鞍山富安花園嘅辦事處已於上周四結束運作，欣安辦事處亦將於日內停止服務。但係佢喺7月頭將兩個辦事處嘅租金以及同事人工等開支遞交上沙田民政處，啲錢至今仍然杳無音信之餘，今個月嘅人工、遣散費同還原辦事處嘅錢都夠期要畀啦，所以希望各方好友幫手，購買舊年鬧口罩荒時預購嘅口罩等防疫物資，減輕下龐大嘅財政壓力喎。又話批量購買仲有送貨服務添！
雖然佢售賣嘅口罩標榜係香港製造，仲送埋搓手液添，但依家市面嘅口罩供應非常充裕，到底會有幾多買家對佢呢批倉底貨有興趣，就真係好難講啦。