政情：梁晃維獄中聽東奧廣播 無畫面同樣刺激
香港運動員喺東京奧運全力以赴，不但家家戶戶都為港隊代表搖旗吶喊，就連監獄裏面都傳出打氣嘅聲音喎。因涉及去年民主派「35+」初選，早前被控違反《港區國安法》而還押待審嘅中西區前區議員梁晃維儘管身陷囹圄，但佢同囚友都有留意賽事資訊，兼且彼此都為競賽中嘅香港運動員而緊張、而焦急，同埋為佢哋嘅成績感到自豪咁話。
為張家朗打氣聲 響徹收押所
有別於一般囚友，目前身處獨立囚室嘅梁晃維冇得睇電視直播，只能透過電台同報紙去獲取賽事資訊。但幸好男子花劍嘅決賽，電台臨時安排喺原有節目入面直播呢場賽事，先至唔會錯過「劍神」張家朗奪得金牌嘅歷史性一刻。
雖然睇唔到畫面，但就似乎仍無損決賽嘅刺激度，喺短短嘅廿分鐘入面，聽住張家朗由先拔頭籌到落後，到追平再反超，氣氛伴隨住賽事發展而轉變，仲形容當去到決勝嘅第15分時，為張歡呼打氣嘅叫聲更響徹荔枝角收押所。