政情：何致宏Fb帳號被永久停用 李嘉達獄中搣甩40磅

被指偽造身份

何致宏喺社交專頁提到，佢嘅Fb個人帳號一直被人惡意舉報，喺今年3月已經試過被指偽造身份而須短暫停用帳戶，其後上載身份證明文件就解決咗問題。不過帳戶喺今個星期突然又遭到停用，今次同樣要求佢提供身份證明。不過經審查後，認定佢偽造身份，決定永久停用其帳戶，仲要不得上訴添。

觀塘區前區議員李嘉達因參與去年民主派「35+」初選，涉嫌違反《港區國安法》正被還押。近日有探監人士指本身係「肥仔」嘅李喺獄中利用時間強身健體，每日做兩個鐘運動，包括掌上壓同埋仰臥起坐，由105公斤減到87公斤，即係足足輕咗40磅。佢之所以咁勤力減肥，理由係要令家人安心，最好就係一眼睇到佢比起以前更加健康強壯。