政情：工會背景設新智庫 議員「另起爐灶」
雖然社會不缺團體同組織向政府提供意見，但唔少深層次矛盾仲未解決。有工會背景嘅議員尋日成立新智庫，希望匯聚志同道合嘅人才參與同研究，以解決房屋土地、勞動市場等多項深層次矛盾。之不過，議員既然有工會背景，點解唔同工會反映，反而要「另起爐灶」呢？
稱探索6大範疇 解決深層矛盾
議員麥美娟（Alice）係新成立嘅智庫組織「治港新政」嘅發起人，佢話平台嘅成員來自不同專業界別，希望可以共同提供意見，做到政策倡議、改善管治情況，從而探索勞動市場、國家行政、土地房屋、醫療衞生及社會福利、環境及創科、教育及人力等6項範疇，繼而改善香港深層次矛盾。
Alice又話平台得到工會嘅支持，不過就獨立運作，仲預料往後都會有不同智庫相繼成立添。該組織成員鄧家彪就話「冇特點」就係平台嘅賣點，強調並非要名成利就，亦唔係通往政府嘅旋轉門，相信只有每份研究報告嘅最後一頁，先會有成員嘅署名咋！