政情：辭任區議員失業 張文龍做包裝工人
政府將為區議員進行宣誓，不符合宣誓資格嘅區議員會被褫奪議席之外，更傳出會追討逾百萬元薪津，隨即爆發離職潮，同時亦製造一批失業大軍。葵青區議會前副主席張文龍自本月20日正式請辭後，一直處於待業狀態，為免坐食山崩，佢都要捲衫袖重投勞動工作，做包裝工人咁話。
網上（手窊）撈搵工
張文龍尋日喺社交平台交代近況。劈頭就話辭任區議員一樣要輸十萬八萬，所以唔可以游手好閒，要的起心肝、重投勞動生涯，客串包裝手工啤，避免坐食山崩。跟住仲打蛇隨棍上，問有冇街坊想參觀酒廠呢？雖然冇詳細交代地點，但有眼利網民發現佢置身喺一所街坊企業。或者佢都擔心客串工作嘅收入唔係咁穩定，留言話有咩工作或合作好介紹歡迎搵佢喎。
講完搵工，佢又問仲有冇人收留影印機？睇嚟係佢議辦嘅影印機嘞，辭任區議員後似乎仲有手尾要處理喎！