政情：無法提早退租 丘文俊議辦轉型搞活動

稱房協冷漠欠人性化

丘話已於6月向房協表明，喺8月1日前辦理退租。其後佢於本月8日辭任區議員，亦有再去信房協陳情，希望盡早退租以減少財政負擔。後來佢嘅退租申請被房協拒絕，指除非有下一手承租該舖位，否則仍需繼續交租。至於丘喺水泉澳邨月泉樓嘅辦事處，則獲房屋署接納退租並已於本月9日辦妥手續。丘話對比房屋署嘅靈活處理，房協顯得冷漠同欠缺人性化。丘尋日再透過社交平台，指租約列明舖位係議員辦事處之用，但佢已經唔係議員，質疑合約係咪已失效？佢又話租約直到2023年12月31日，依家會積極考慮繼續經營該舖位，叫街坊諗吓有咩活動搞喎。

房協回覆本報，指其轄下商舖若用作議員辦事處，租務安排同一般商舖無異，如果租戶要求提前終止租約，房協會盡快為相關商舖招租，當有新租戶承租，房協會安排原租戶退租。若租戶有意更改商舖用途亦可向房協提出申請。而房協上月收到丘申請提早結束租約後，已安排為該商舖招租，上星期啱啱截止申請，現正進行審核，又話會繼續就租務事宜同丘保持溝通。