政情：招民間廚藝高手 詠藜園冀助創業
正所謂民以食為天，煮出美食需要一雙巧手。詠藜園飲食集團尋日舉行記者會，宣布開始「高手在民間」同「英雄有用武之地」活動，招攬有拿手好菜嘅市民，喺評判試食後能夠喺該集團旗下餐廳寄賣，若菜式受歡迎，更能贏取創業資金。
佳餚受歡迎 可獲200萬元
該集團董事楊莉莉話若售賣菜式成功贏取口碑同銷量，集團將提供200萬元資金助廚師創業。譽賜投資有限公司董事林孝能認為活動意義重大，既可傳承中華美食和手藝，又能助人，又話渴望創業或本身從事飲食業卻缺乏資金嘅人士都適合參加。
中華廚藝學院課程經理劉惠表明將鼓勵學生積極參與活動，因為年輕人難以有逾百萬元資金創業，而該集團就幫佢哋一把，教埋年輕人營商技巧添！