政情：畀郵票囚友 鄒幸彤違規釘倉3日
支聯會副主席鄒幸彤因涉嫌呼籲市民參加未經批准嘅6‧4集會，被控一項煽惑他人明知而參與未經批准集結罪，被裁判官下令還押候訊。前議員邵家臻前日下晝去大欖女懲教所探鄒幸彤，提到鄒之前因為同其他囚友分享郵票，觸犯監獄規則，被釘倉3日。呢3日無書本、零食、收音機同報紙，前日鄒先啱啱有得「落山」離開水飯房咋，但邵形容鄒都係一笑置之喎。
邵家臻話15分鐘嘅見面完結時，本身以為會印一印掌印作為道別，但鄒就對佢展現一個韓國心形手勢。邵話探監雖然舟車勞頓，身水身汗，笑言自己有啲臭有啲累，但見到鄒做嘅心心手勢，都值回票價嘅。
跟住佢話之前收過投訴，指大欖女懲教所嘅探訪窗格嘅電話通話太細聲，講嘅人辛苦，聽嘅人都辛苦，之前多次反映也無改善，自己尋日探鄒就更加感受到。佢話到訪過唔同監房，大欖懲教所嘅前線職員態度良好係位列前矛，但就係差在電話通話上面囉！
話唔分享唔舒服
點解鄒分郵票畀囚友？佢尋日喺Facebook貼文，形容自己成為咗獄中嘅「資產階級」，佢話接受唔到自己比旁人多咁多財產，話唔分享周身唔舒服，但規矩就係規矩，唔畀分喎。但佢都話自己有啲自私嘅，唯獨書本同紙筆就絕對唔想分享喇！