政情：任區議員最後一日 王偉麟屁股畀狗咬
喺區議員辭職潮下，逾200名泛民黯然退場，有人更經歷「最慘痛」last day（最後上班日）。日前已卸任觀塘區議員嘅王偉麟，前日就喺Facebook上載短片，見到佢畀一隻狗仔連環咬晒左右兩邊pat pat，痛到佢成個人彈起。貼文又透露，當日係佢擔任區議員嘅最後一日。
網民笑爆嘴
之不過，有網民就問點解會咁啱會有錄影，質疑係咪喺度做緊戲。王偉麟就透露，自己當時同義工喺油塘拯救狗仔，所以有其他義工喺遠處觀察，以免狗仔逃離視線範圍。
或者因為被咬時嘅反應太搞笑，影片吸引唔少網民回應，更有三分之一人畀「哈哈」。唔少網民都留言表達同情：「慘，一定好痛！」、「比狗狗咬真係好痛好慘嘅！」但好多人留言時都同時提到：「不過咬嗰下忍唔住笑死，抱歉！」、「見到你個滑稽樣忍唔住笑咗出嚟，真係唔好意思！」更加有網民留言「盛讚」，話「呢個市民真係帶畀大家好多歡樂」添！