早產女嬰悅悅離世 母懷中化身小天使
【本報訊】出世後因壞死性腸炎而患上短腸症的一歲早產女嬰悅悅，與病魔搏鬥至今一年，本月15日病情惡化。悅悅父母前晚（24日）在社交平台Facebook專頁「CoKa.Kona Baby」，發表一段展現出悅悅笑容滿臉的短片，同時指出女兒已於當晚7時許，在媽媽懷抱中離世，跟天父去做小天使。
感謝市民支持悅悅
在社交平台貼文中，悅悅的父母形容「小悅悅一生為好多人帶嚟歡笑，佢係所有人眼中嘅一個開心果，佢亦為好多人帶嚟希望，改變好多人對生命嘅睇法，令更多家庭更加珍惜自己嘅子女，悅悅雖然生命唔長，但喺短短嘅時間做咗好多人一生都未必做到嘅嘢。」
悅悅的父母稱：「爸爸媽媽永遠會自豪有你呢個女兒，你係全世界最漂亮最可愛。」「悅悅終於都得到解脫，你嘅努力同堅持爸爸睇到晒，你上到去記得問天父拎你最愛嘅星星餅同波波米呀！」悅悅的父母又不忘多謝一眾支持女兒悅悅的市民，一直以來對悅悅的支持及愛護，悅悅已安詳地回到了天父身邊。