獄中擁抱囚友違規 袁嘉蔚罰坐「水飯房」10日

因去年6‧4非法集結案而遭判囚4個月嘅南區前區議員袁嘉蔚,周二雖服刑期滿,但因去年民主派「35+」初選案而轉為還押身份等待審訊。之不過,佢喺轉倉當日同其他囚犯有身體接觸,觸犯《監獄規則》而遭到獨囚「水飯房」嘅懲罰!

由定罪犯變還押犯

話說袁嘉蔚嘅社交平台專頁尋日透露,袁同相熟囚友擁抱之後,佢同5名同倉囚友被罰獨囚「水飯房」10日。貼文引述懲教人員解釋,話處分理由係「與其他囚犯有身體接觸」,但「已經罰少咗」,因為「攬一個人罰5日,依家只係當你(袁嘉蔚)攬咗兩個人」。貼文又指袁隔離囚禁期間唔能夠「食私飯」、收取信件,唔可以閱讀書籍等,質疑係剝奪袁所有福利。

有消息人士透露,袁當日由定罪犯轉為還押犯,當佢被帶往還押犯嘅活動室時,有幾名之前認識嘅還押犯舉自製紙牌歡迎佢,又互相擁抱,呢個情況喺監獄內從未發生過。內行人一睇就知,呢個情況觸動保安紅線,佢以為係六、七十年代監獄風雲,好明顯袁喺該組還押犯形成一股勢力,並公然作出有關舉動。據悉,署長胡英明即時下令要瓦解呢股勢力,相信袁等人會繼續被隔離。