政情：修例允律政人員任資深大狀 委員會首場會議兩分鐘收工
律政司早前向立法會提交《2021年法律執業者（修訂）條例草案》，讓非大律師嘅律政人員喺符合相關資格規定情況下，可獲委任為資深大律師，但條例備受爭議。立法會相關委員會尋日舉行首次會議，議員容海恩喺無競爭下「火速」當選委員會主席，會議全程僅約兩分鐘就「收工」。
容海恩當選委員會主席
會議上，議員周浩鼎提名容海恩，容喺無競爭下自動當選主席，選舉主席流程大約30秒內完成。容其後諮詢委員係咪需要各界表達意見，周就建議網上或書面表達就足夠，其他委員亦冇意見。及後，容話下次開會時間要同律政司商討，隨即宣布散會。
雖然律政司司長鄭若驊話相關修訂唔會影響私人法律職業者嘅任何權利，不過大律師公會就表明反對，之不過鄭都係無視反對意見照樣將條例草案提交立法會。唔知議員開會討論或者諮詢各界意見嘅時候，又會唔會意見不合而嘈起上嚟呢？