政情：除官僚陋習講就易 公務員學院效成疑
被喻為「鐵飯碗」嘅公務員團隊問題多多，不但處事官僚效率低，且奉行「少做少錯」嘅原則。前年反對修訂《逃犯條例》風波一役，更揭露部分公僕吃裏扒外！立法會人事編制小組委員會尋日開會，通過就新成立嘅公務員學院開設院長一職。審議期間，多名議員重提公僕團隊過去兩年嘅表現，有人坦言失望，亦有人關注「黑暴」分子滲入公僕團隊。
繼早前要求所有公務員宣誓，確保擁護《基本法》同效忠香港特區，政府更決定成立公務員學院，加強對公僕團隊嘅培訓工作。公務員事務局局長聶德權就形容，當局將以往嘅公務員培訓處「升格」，強調公務員學院院長要具領導能力，同時要對國家有所了解。聽政府嘅講法，相信公務員學院成立後，可能真係可以改變到公僕過去啲陋習喎。
之不過，金融服務界議員張華峰（肥老闆）就未必咁有信心喇。肥老闆發言時提到過去兩年，公務員團隊不論喺反修例風波期間，抑或係自去年初至今嘅防疫抗疫工作，兩者都令市民感到失望喎。
今年第四季招聘院長
聶德權回應時就為一眾下屬發聲，強調喺反修例期間表現甚佳嘅紀律部隊，本身亦係公僕團隊嘅一員，又坦言喺抗疫期間衞生部門亦費盡心思。佢又話，明白有好多事情要吸取經驗、尋求改進，但強調亦要為公務員嘅投入同付出予以肯定。
議員郭偉强形容，反修例事件反映「黑暴」無孔不入，期望公務員學院可加強相關教育工作，同埋進行《基本法》等推廣。另一議員黃定光就關注院長嘅立場，話呢個係非常關鍵嘅問題。
聶就強調，當局喺招聘院長時，會考慮人選對一國兩制方針、憲制秩序、《港區國安法》同國家發展等，係咪有正確同透徹嘅認識，又重申呢啲範疇亦會係公務員學院嘅培訓重點。佢又話，當局目標喺獲得財委會批准後，今年第四季進行公開招聘，明年首季委任合適人選。