政情：梁凱晴短髮出獄 即落區拆報告板
觀塘前區議員梁凱晴由於出席去年六四集會，而被控參與未經批准集結罪，被判入獄4個月。佢喺星期二出獄，不過睇嚟都冇得休息住，皆因佢當日已經即刻收到通知要拆除社區嘅報告板啊。
親手整理 指有始有終
梁凱晴喺社交網站分享，相信各位街坊已經發現，原本喺一所小學隔籬嘅社區報告板唔見咗。由於梁被判刑，失去區議員資格，星期二「放學」後已經即刻收到通知要移除報告板，星期三就趕到原屬月華選區，同義工一齊親手卸下剩餘嘅3塊社區報告板，話係有始有終。佢又提到，等佢再休息多陣，整理一下思緒後，會再同大家分享更多。
梁凱晴入獄前有一頭洋溢少女氣息嘅及肩髮型，不過喺獄中已經剪成清爽短髮，身形亦較以往瘦削。久違嘅佢今次落區，唔知一班街坊仲認唔認得佢呢？